Betawi Punya Cerita: Radio Transistor

SEKARANG yang namanya Radio udah jadi barang antik, orang udah kaga demen ama yang begituan.

Apalagi sekarang mah banyak alat elektronik nyenga pada canggih mo dengerin lagu kesukaan tinggal download, streaming bisa dengerin lagu ama ngeliat orangnya di hape. Kaga kaya jaman dulu mo muter lagu enak entuh gelombang radio diputer-puter nyari nyeng pas di kuping. Mo lagu kesukaan kudu masang kaset dulu. Iya kalo entuh lobang kasetnya bersih kaset kedengarannya enak, tapi kalo kotor entuh lagu jadi ngerebek,kaga danta suaranya udah gitu pita kaset pada kusut awut-awutan nyangkut di head kaset. 

Tapi zamannya sandiwara radio lagi booming, entuh radio jadi barang nyeng paling diresepin Kalo udah jamnya entuh sandiwara maen nyeng namanya baba, emak ama bocah pada ngumpul nangoh di depan radio. 

Kalo Saur Sepuh, Misteri Gunung Merapi dan Babad Tanah Leluhur maen entuh jalanan pada sepi. Orang pada betah di rumah. Nang lagi nyawah go pada ngasoh dulu di gubug dengerin entuh sandiwara sambil ngopi ama biang dodol nyeng udah rada buluk. Kalo malem ari entuh engkong kita demen bener ama yang namanya dengerin wayang kulit, topeng dan siaran semi Sunda. Bari rebaan dibale entuh engkong pada dengerin radio.    

Resep bener di jaman kita masih bocah entuh radio Noble kita indit-indit kita bawa maen, cuman gara-gara takut ketinggalan acara nyeng kita demen. 

Pas musim jaga burung,sawah padinya udah pada nontot kita jaga burung sambil dengerin radio jadi kaga bete. Abis lohor dengerin lagu slow mata jadi merem, kaga berasa ngulet entuh radio kedepak kaki kita, ngegelinding nyemplung ke sawah. 

Untung kaga nyebur ke aer nyangsrang dipuun padi nyeng pada rebah kena angin...entuh radio tetep bebunyi. Mana pas lagunya Elvi Sukaesih lagi yang judulnya Mandi Madu " basah....basah ..ah mandi aer sawah.

Tapi biar gimana go saya mah masih demenan ama radio dah ketibang ama yang namanya youtube, TV streaming, Google emang bagus sih nambah wawasan ada gituan, tapi akibatnya ada gituan entuh bocah pada ngebuka gambar, film  nyeng kaga puguh laguh koan. Mendingan radio Noble juga dah lebih aman buat bocah. 

Sekarang enoh nyeng namanya radio Noble dipajang di tempat barang antik udah jadi barang aneh.... 

Bang ILok

Ketua Yayasan Kebudayaan Orang Bekasi ( KOASI)

Dari Indonesia Tempo Doeloe